ဝဋ်ကြွေး

ဆောင်းလယ်အိပ်မက်
အအိပ်ခက်တယ်
အိပ်စက်ဘယ်ပုံညွှန်းပါ့မယ်  ။


နှောင်းဝယ် တိတ်ဘက်
အဆိပ်တက်တယ်
နှိပ်စက်သည်ပုံဖြစ်ရတယ်


လူ့ဝယ် စိတ်ဓာတ်
တံဆိပ်ခတ်တယ်
ခန်းပိတ် နှလုံးငိုကွယ်ရို့   ။


ခုနှယ် ဤဇာတ်
ချစ်ဓာတ် ပျက်သည်
စိတ်ဝယ် နေဝင်ညိုတယ်ကို   ။



ဆောင်း တိတ် နှောင်း ချိတ်
လူခြေတိတ်သော်
ဆိတ်ဆိတ်ရင်မှာ ပြိုကျပါသည်
ဝဋ်နှယ် သည်ပုံဖြစ်သတည်း  ။


မောင်ရေခဲ

ဝန်ခံချက် ။
              (ကိုနေဇော်လင်းဆီပို့ဖူးတယ်ဗျ....ညီနေဇော်လင်းရေ ကိုယ်တင်လိုက်ပြီနော်)

ကမ်းတစ်ဖက်

မကြင်သမျှ   ခင်နှမ နဲ့ပက်သက်မှဖြင့်

ယခင်သံသယကိုတောင်

ကွမ်း လိုယောင်ဝါးလိုက်ချင်ပါရဲ့

မှားလိုက်ဝဋ်တွေ

အသိုက်ချွေ   အခက်ချိုးသော်လည်း

အချစ်ပျိုး သည်ရင်ကြောမှာ

ပြစ်ကျောမျှ ထင်ဘူးခင်ရေ

သံလွင်လွင်ကမ်းဘက်

ဂန္ထဝင် ပန်းတစ်ခက်ကြောင့်

အလှမ်းခက်ထင်ဘူးကွယ်လေ

အနေတွေ ဘယ်လောက်ဝေး

အတွေးမှာ မှန်းကာဆ

တမ်းတလို့ဆွေးစိတ်မပြေ

မှေးမှိတ်မလေ

မျက်တောင်တို့မြေးယှက်ပြန်တော့

တွေးချက်က သူ့မျက်နှာ

လ ထိန်ထိန်သာ

အသွင်မှာ ပျော်ကာမြူးသော်လဲ

ဘွင်မှာ မောကာ မူးပါပေါ့

လူးလား ဘွင်မှာ

ဆူး ခါး ရင် ဗျာ

လ  ..လွင်လွင်မှာ

ကြင်သူတွေ ပျော်ကာမြူးသော်လဲ

အလျင် ပျော်ကာမြူးချင်ပေါ့

သြော်

နှောက်ယှက်ဝဋ်ကြွေး

 

 

                                                                           မောင်ရေခဲ

အပြီးပြန်မယ့်သူ

စိတ်အလိုမကျဖြစ်တဲ့အခါ

စကားတွေမညီမညွတ်ဖြစ်တဲ့အခါ

ရိုင်းရိုင်း စိုင်းစိုင်း ထွက်ဆိုမိတဲ့အခါ

ငါ့ကို ခွင့်လွှတ်ပါ

ငါက

အပြီးပြန်မယ့်သူမို့ပါ

 

ငါနေထိုင်တဲ့အခါ

ငါပြောဆိုတဲ့အခါ

ပွင့်လင်းမှု့တွေနဲ့

ငါ့ကိုယ် ငါ အိုးမဲသုတ်မိရင်

ငါ့ကိုခွင့်လွှတ်ပါ

ငါက

အပြီးပြန်မယ့်သူမို့ပါ

ပရမ်းပတာ နေထိုင်မိတဲ့အခါ

ပရမ်းပတာ ပြောဆိုမိတဲ့အခါ

စကားတွေဖောင်းကြွလာတဲ့အခါ

ငါ့ကိုခွင့်လွှတ်ပါ

ငါက

အပြီးပြန်မယ့်သူမို့ပါ

                                မောင်ရေခဲ

 

 

13/အပိုင်းအစ

အလွမ်းတွေက ဓားတန်းလန်းနဲ့ငါ့ရှေ့ရောက်လာတော့
ကြယ်ကလေးတွေတောင် အသံတိတ်ကုန်ပေါ့
အလည်လွန်နေတဲ့ လမင်းရေ
တကယ်ဆို ငါဟာ ဒိုင်ပွဲမရပ်ခင်ကတည်းက ရှုံးနိမ့်သူပါ
ငါ့အတွက်နဲ့တော့ မင်းမူယာတွေ မပွန်းစေနဲ့နော်
တော်တော်ကြာ
မျှားထမ်းပြေးလာတဲ့ ဟိုကောင်ကလေးကအပြစ်တင်နေပါ့မယ်
တကယ်ဆို ကိုယ်က
မင်းနဲ့တွေ့မှကျောက်ခေတ် ကိုပြန်ရောက်ချင်သူပါ
တစ်ဘုံစားတွေနဲ့ ကျင်လည်ရာလောကထဲ
မကျွမ်းကျင်တဲ့ ငါ့ကိုသာအပြစ်တင်လိုက်ပါ
နင့်နဲသိပ်သည်းစွာ အရာရာနောက်ကျတဲ့နောက်မှာတော့
စခန်းသိမ်းပွဲတောင်မတိုက်လိုက်ရတဲ့စစ်ပွဲ
ဒီတစ်ချီတည်း ပွဲသိမ်းပြီပေါ့
မေ့လျော့ခဲ့တာမဟုတ်ပါဘူး
မင်းကိုတွေ့တိုင်း သဘာဝတရားကဖန်းတီးထားတာပါ
မင်းအတွက်ဆိုငါက
အလွမ်းအမုန်းတောင်မထိုက်တန်သူလို့ဆိုရမလားပဲနော်
နောက်ကျချင်းတွေသာပိုင်ဆိုင်တတ်တော့
ဂျိုကာနှစ်ကောင်ပါပြီးမဒေါင်းတဲ့ ဖဲသမားလို
နှစ်လုံးတူပြီးမပေါက်တဲ့ ချဲသမားလို
ငါ
ကံကိုပဲရိုးမယ်ဖွဲ့လိုက်တော့မယ်

                   
                                      မောင်ရေခဲ

သားကောင်များ

***  ဒီလိုလုပ်   ဒီလိုကျင့်

ခပ်ရင့်ရင့် ခိုင်း နှိုင်း 

သံသရာ မရိုင်းရလေအောင်

ပုံသွင်းသင်ကြားလဲ

ညွှတ်ကွင်းတွေကြားထဲ

လွတ်ကင်းဖို့ခက်တယ်

***  တဒိတ်ဒိတ်ရင်ခုန်သံ

စိတ်သံ  ၊  ရုပ်သံ

တညံညံ ဝန်းရံခ

တွန်းလှန်ချဖို့ခက်ပြန်မှတော့

 နိဗ္ဗာန်ကိုစိတ်သန်နေလို့ အပိုပါပဲ

***  အနု ၊ အလှ သမုဒယ ပေါများရာ

ဒီ ဇလာတော မှာ

မျောဖို့ရာလမ်းများတယ်

***  ဒုက္ခ ဆိုတာ

ခမ်းလိုက် လန်းလိုက်ဆိုပေမယ့်

ချိုတယ် ထင်ထင်နေတော့ခက်တယ်

*** အရှိုက်ခက်မှန်း သိရက်နဲ့

အသိုက်တွေ ခပ်မိုက်မိုက်လုပ်

အချုပ်ကိုတွေးရင်း တွေးထင်

ဒီနေဝင်ချိန်ဟာလဲ

မျက်နှာလွှဲခဲ့ ပြန်ပါရော

မောင်ရေခဲ

တောင်ပံမဲ့ နေ့စွဲများ

စိတ်တောင်ပံတွေတဖျတ်ဖျတ်

ရက်လုပ်ခဲ့ရတဲ့နေ့စွဲတွေ

အပြုံးတု  .. အငို တု ... မျက်နှာ တု တွေထုတ်

လူလုပ်ဖို့ခက်တဲ့အရာ

လူကပဲ ပြန်လုပ်နေလေရဲ့

အငြူအစူတွေ ကလူကျီစယ်သလို

ယိုစီးပေါက်ကျ

တစ်ချို့က

ဒါ ..သင်္ခါရ ..တဲ့

အလှအတွက်ပြုပြုရ

ဘဝအတွက် ပြုပြင်ကြနဲ့

အခုမြင်တဲ့ ခဏတွေတောင်ပြောက်

ရောက်ခဲ့တဲ့ရာစု အစပေါ့

လျော့ရဲလာတဲ့ ယဉ်ကျေးမှု့တွေ

အဖော်မဲ့လာတဲ့ ဒီစနစ်တွေကြား

ချုပ်ဆက်ဖို့ ခက်လာရော

ဒီလို ဒီလိုနဲ့

သီအိုရီတစ်ခေတ်မှာ

အချစ်တွေပါစနစ်ပြောင်း

ရောင်းကုန်တွေဖြစ်ခဲ့ပေါ့

                             မောင်ရေခဲ

ရင်ဝေးနေသောနေ့ရက်များ

အဆင့်မြင့်မြင့်စားသောက်နေထိုင်ဖို့
နေ့နေ့ ညည ပြေးလွှား
တစ်ရေးနားဖို့ခက်ခဲ
အမေ့ရွာက ထန်းရွက်တဲလေးကိုသတိရ မိရဲ့
အမေ နဲ့ ဝေး
အဖေ နဲ့ ဝေး
မိတ်ဆွေ ၊ သူငယ်ချင်းတွေနဲ့ဝေး
အနာဂတ်တွေတရေးရေးပြေးမြင်ဖို့
မနေမနား
တစ်ရေးနားစားသောက်ချိန်
ဂုဏ်ရှိန် ငွေရှိန်ကင်းတဲ့
အမေ့အိမ်က ထမင်း နဲ့ ဟင်းကိုလွမ်းရဲ့
ကိုယ်ခန္ဓာ နွမ်းလျ
တမ်းတမိတဲ့ အချိန်တိုင်း
ဟို ဆေး ၊ ဒီ ဆေး
မိတ်ဆွေ ဆေး ၊ သူငယ်ချင်း ဆေး
လက်ကမ်းလို့ပေး
အမေ့ အခန်းက ကိုယ်ငွေ့လောက်မနွေးဘူး အမေ
အလုပ်ပြီးတဲ့ အချိန်ဆို
လွမ်းစိတ်ပို နွမ်းချိ
တစ်ကိုယ်တည်းရှိတဲ့အခန်း
အတွေး နဲ့တောင် မရဲတရဲမှန်း
ငရဲခန်းလားထင်
ည  ည အိပ်ချိန်
မိ အိမ် ဖ အိမ်
မိသားစုအိမ်
တရှိန်ရှိန်တောက်လောင်နေကြမေတ္တာတရား
တထိန်ထိန်မြို့ပြ နဲ့နှိုင်းချိန်တိုင်း
စိတ်တောင်ပံခတ်
ပြန်ရက်ကိုလက်ချိုး
ရှိးခိုးလျက်ပါ  ဖေ ၊ မေ


                                             မောင်ရေခဲ

★" ဆောင်း မိုး ကြားမှာ.. ဖွားသော.. သားစနေ.. ရေခဲရေ "♪♫

ဆယ့် နှစ်.. ဆယ့်တစ်… တစ်ဆယ့်နှစ်….

လျှပ်စီး လက်ဆဲ… မိုးသည်း ညနေ …

လွန်လေခဲ့သော.. နှစ်နှစ်ဆယ်ကျော်…

ဆည်းဈာ တိမ်တောက်.. ညနေ ခြောက်နာရီ….

မှုန်ရီ အုံ့မှိုင်း.. ရှစ်ခွင်တိုင်း…

ဆောင်း ကို ရောက်ငြား…  မိုးသည်းသည်း ကြား…

သားလှ ဖွားမြင်… မေမေ့ရင်…

ကြည်သာ ရွှင်ပြုံး.. အလှဆုံး…

တစ်လောကလုံးကို. မေ့ခဲ့သည်…။

မေမေ့ ရင်သွေး…

သားဦးလေး.. ရေ..

စနေခါမှာ….  ဖွားမြင်တာမို့..

ရှေးထုံး ရှေးလာ… မပယ်ဖျောက်သာ….

မွေးဖေ..  ဓါးထမ်း….  ကျော်ခဲ့ရှာသည်…။

သို့ပါသော်ငြား …

ဖေ မေ့ သား…

ယနေ့ ချိန်ခါ.. ကျရောက်လာသည်…

နှစ် နှစ်ဆယ်ကျော်…. မွေးနေ့တော်၌…

လူတော် လူချွန်.. လူရည်မွန်…

ကိုယ့် ၀န် ထမ်း ရင်း… လျှောက်လှမ်းနေ..

မွန်မြတ်လေစွ.. သည် သားလှ …

လောက အ၀ှမ်း…. သို့..   ကဗျာပန်း ဝေ…  ရင်ငြိမ်းစေ…….။

မောင်ရေခဲ ရေ... မွေးနေ့တိုင်းမှာ.. ပျော်ရွှင် ချမ်းမြေ့ပါစေနော်...

ခင်တဲ့ မမ.. ထာဝရ "နွေဦးမေ"

 http://nwaeoomay.blogspot.com/

 ကျနော့်မွေးနေ့ အတွက် ပို့ပေးတဲ့ 

မနွေဦးမေ ရဲ့

တဂ်ပိုစ့်လေးပါ

အမေ့တေး

အံသြမိပါရဲ့

              အတ္တတွေဖြိုချ  ယိုစီးဖို့ခက်တဲ့အရာတွေကြား
               သူမ က အနီရောင်ပန်းဝတ်မှုံတွေကို အဖြု အစင် ဖန်ဆင်းတယ်

အံသြမိပါရဲ့
       ဒုက္ခ သုက္ခ တွေကို လက်ဖက်သုတ် တစ်ပွဲလို သုပ်
       ဘဝကိုတည်ခင်း အပြုံးတွေပြိုဆင်းလို့
        ရင်ရင်းမေတ္တာတရားအောက်ပျော်ဝင်နေတာကိုပေါ့

အံသြမိပါရဲ့
           မသေချာတဲ့ အရာတွေကိုရေရာဖို့မျှော်တွေး မသေချာတဲ့ အလောင်းအစားကို
            ချွေးတွေနဲ့ အရောင်တင်
             ညလွင်ပြင်အိုတွေနဲ့ - " အို့ -အို....အို     အေး   " .... သားချော့တေး  တွေဆိုလို့     
            ကမ္ဘာသစ်ကို ဖန်ဆင်း  အလင်းတွေ လင်းစေခဲ့တယ်

အံသြမိပါရဲ့
          သူမ သာ အနားရှိရင် နေမဝင်အင်ပါယာ မပိုင်ရလဲ နေပါစေ လို့ဆိုရဲတဲ့အထိ
           သတ္တိထူးတွေနဲ့ မြူးတူး   ဘယ်ညတွေ ဘယ်လိုလူးလူးပေါ့
           လောက ကို ရင်ကော့ လျှောက်ရဲတတ်လာတယ်

အံသြမိပါရဲ
           သူမ ရဲ့ခွန်အား ဟာ ရင်သွေးတွေဆီ စီးဆင်း အသက်တွေကြီး ပြီးရင်းကြီးပေါ့
           သူမ ရှေ့ ရောက်ရင် ကိုယ့်ကိုယ်သိလာတယ်
            ကလေးတစ်ယောက်ဆိုတာကိုပေါ့

အံသြမိပါရဲ့
           သူမဟာ အံဖွယ်လူသားတစ်ယောက်ဆိုတာ သိလိုက်ရလို့ပေါ့

                                                                   12/11/2012 နေ့ရဲ့
                                                                               အိပ်ယာဝင်တေးလေးပါပဲဗျာ
                                                                                                    မောင်ရေခဲ

Happy Birthday Ko YayKhe

                                         

ကိုရေခဲ

တစ်ကိုယ်ရေထဲတွေး

ကဗျာတွေရေးလိုက်

စာတွေတွေးလိုက်နဲ့

အပြေးကလေးနှင်

မွေ့နေ့မှာ ပျော်ရွှင်ပါစေ...။

ကိုရေခဲ

စိုပြေဆဲအတွေး

ချိုနေတဲ့အရေးတွေနဲ့

ငိုနေတဲ့လောကအတွက်

အားပေးတဲ့လက်တစ်စုံဖြစ်ဖို့

အဖုံဖုံသာမောကဗျာတောမှာ

အမောမဖောက် ဆက်လျှောက်နိုင်ပါစေ....

ကိုရေခဲ

နဂိုနေမြဲမငေးနဲ့

ကြိုနေတဲ့ အရေးတွေကိုမြင်

လိုနေတဲ့စွမ်းအင်တွေကိုဖြည့်လို့

အဓိကနဲ့သာမညကုိခွဲခြား

တရား/မတရားကွဲပြားပါစေ.....

မွေးနေ့မှာပျော်ရွှင်ပါစေဗျာ..

      မင်းရဲ့သူငယ်ချင်း       

         ကိုရတုသစ်

12/11/2012 တွင်ကျရောက်သော

ကျနော့်မွေးနေ့အတွက်

ကိုရတုသစ် ရဲ့ တဂ်ပိုစ့်လေးပါ

 

ကျေးဇူးပါအမေ

သူငယ်ချင်းရေ

ဒီတစ်ခါ

ငါ့မွေးနေ့

မနေ့ကအကြိုအဖြစ်

တောလဲသံတွေနဲ့ကြိုဆို

အငိုတရားတွေတွေ့ခဲ့ ကြားခဲ့ပေါ့

ဘဝကို အငိုတရားတွေနဲ့

ဒီနေ့လိုနေ့မျိုး

လွန်ခဲ့တဲ့23နှစ်က စ ခဲ့ဖူးတယ်

တန်ဆောင်မုန်းရဲ့ ဆောင်းတွင်း

မိုးပြေးတွေခရီးနှင်ခဲ့ဘူးတယ်

ဒါတွေတဒင်္ဂမေ့

အမေ့ မေတ္တာတရားတွေ ဟောဒီကမ္ဘာထဲ

အမေ့ရဲ့ ရင်ဘတ်ထဲ

ဆောင်းမှာကျတဲ့မိုးသည်းတွေနဲ့အတူ

တသွင်သွင်စီးဆင်းရဲ့

သူရို့ကပြောကြတယ်

မွေးလာတဲ့သား

ကျား  တဲ့

သား ဦး စနေ ဆိုတာ

ဓားထမ်းကျော်ရတယ်ဆိုပဲ

ဒါတွေကိုအသာထား

အမေ့မေတ္တာတရားနဲ့ချွေးသိပ်

ရိုးရာတွေကိုနှိပ်ကွပ်ခဲ့တဲ့အမေ

ယဉ်ကျေးမှု့နဲ့ ဘာသာတရား

စေ့စပ်အောင်သင်ကြားပေး

မျိုးစေ့တွေဝေစေတဲ့အမေ

ခေါင်းမှာအလံဖြူတွေစိုက်လဲ

သီအိုရီတွေရိုက်သွင်းပေးခဲ့တဲ့အမေ

မျက်လုံးတို့ပြာရီ

ဘဝအလီကိုသင်ကြားပေးခဲ့တဲ့အမေ

မျက်နှာတို့လှိုင်းထန်

ဘဝရန်တွေကြား - ကျားကန်ပေးခဲ့တဲ့အမေ

တဖြေးဖြေးပြန်တွေးရင်း

တရေးရေးဂုဏ်ယူနေမိတယ်လေ

                                        မောင်ရေခဲ(အဝတ်နီ)

12/12/2012 -တွင်ကျရောက်သော
ကျနော့် မွေးနေ့ တွင်

အမေ့အတွက်ဂုဏ်ပြု ကဗျာ