အိပ်မပျော်တဲ့ညကပေါ့
အိပ်မက်ခါးခါးတွေကို ခါးတောင်မြှောင်အောင်ကြိုက်ပြီး မော့မော့သောက်တယ်
အအေးလွန်နေတဲ့လမင်းကလဲ မလင်းနိုင် မမှိန်နိုင် ရိတွဲကျလို့
အိပ်မပျော်တဲ့ညကပေါ့
ချစ်သူရဲ့ချစ်ခြင်းတွေ ကြယ်တစ်သန်းနဲ့ယှဉ်ပြ တကယ်ဆို အခ်စ္က အမုန်းထက်ပူတယ်
ကလူကျီဆယ်နေကြတဲ့ ပိုးစုံးကြူးလေတွေတောင် အိမ်ယာတွေဆီဦးတည်နေပြီ
ညို့ငင်အားကောင်းတဲ့ မှော်ဆရာလို ငါ့ကို ပြုစားခေါ်ငင်နေတဲ့ လ မသာတဲ့ ကဗျာတစ်ပုဒ်
ခံစားမှု့တွေနဲ့ယက်ထုတ်ကြည့်ရင်း လေဟာနယ်ထဲသက်ဆင်းခဲ့တယ်
အိပ်မပျော်တဲ့ညကပေါ့
မျှော်တော်ယောင် ကန်းနေတဲ့ ကမ်းနဖူးကိုမေးတင်လို့ ဆေးလိပ်ငွေ့တွေနဲ့ မောင်းခုတ်ခဲ့တယ်
နှလုံးသားကို ခုန်အုပ်သွားတဲ့ ကောင်မလေးအကြောင်းကလဲ မပါမျပီးတဲ့ နဂါးငွေ့တန်းတစ်ခုကို
ယုယုယယ သိမ်းလို့ ဒိုးယိမ်းညတစ်ခု လေဟာနယ်ကမ်ဘာမှာ ဇာတ်ပွဲကျင်းပတယ်
အိပ်မပျော်တဲ့ညကပေါ့
ခွေးအူသံတွေ ရေလှိုင်းခတ်လို့ ဖိုသီဖတ်သီနိုင်တဲ့ တိမ်တစ်အုပ် သူ့မျက်နှာကို လာဟပ်
မသပ်မရပ် တစ်ပိုင်းတစ်စ ကဗ်ာ တစ်ပုဒ်နဲ့ ညဥ့်လယ်ကိုတောင် အားနာမိရဲ့
အိပ်မပျော်တဲ့ညကပေါ့
အဝေးရောက်နေတဲ့ ခင်သူ မင်သူ မိတ်ဆွေ အချို့နဲ့ ကျနော့်ရဲ့ ကဗျာမလေး
ရုပ်ရှင်တိမ်တိုက်ကိုဖွင့်လို့ တစ်ခန်းချင်း လွမ်းတယ်
အိပ်မပျော်တဲ့ညကပေါ့
အမေ့ရဲ့ " မိတ္ထီလာ ကန်ဝယ် ဖားကောက်ခဲ့ပါ့မယ် " သားချော့တေးလေး စားမြုံ့ပြန်ရင်း ဗျိုင်းတစ်အုပ်က ပြန်လာပါခေါ်တယ်
အရည်အသွေးညံလှတဲ့ ဟော့ဒီကဗျာတစ်ပုဒ်နဲ့ ရှတတ မျက်နှာကျောက အငြင်းဝါကျတွေရေရွတ်ပေါ့
အိပ်မပျော်တဲ့ညကပေါ့
မိဘမဲ့ကလေးတွေအကြောင်းကို ငေးရင်းတွေးရင်း ငါ့ကိုယ်ကို ငါ့ လက်ပြန်ဆုပ်မိတယ်
ရင်ဘတ်ချင်း ဂျက်ပင်ထိုးဖို့ခက်တယ်ဆိုတာ ကိုယ်တိုင် ကိုယ်နဲ့ ရန်ဖြစ်ဖူးမှပါ
အိပ်မပျော်တဲ့ညကပေါ့
ရွာအဝင်က တမာပင်ကြီးရယ် ရွာအနောက်က မူးမြစ်ကမ်းရယ် စာကြည့်နေကြ စားပွဲလေးဆီ
စိတ်တွေက ခိုလို့ ဝင်လို့ မြူခိုးတွေ ရစ်ပတ်နှောင်ငင်နေတယ်
အိပ်မပျော်တဲ့ညကပေါ့
ကဗျာ တစ်ပိုင်းတစ်စနဲ့ ကိုယ့်ကိုယ်ကို မီးရှို့ခဲ့တယ်
အိပ်မပျော်တဲ့ညကပေါ့
ကြွေကျသွားတဲ့ကြယ်ကလဲ အလင်းတစ်သန်းပြနုတ်ဆက်
ဝေကျနေတဲ့ ဝေဒနာတွေက အချင်းမကျသေးတဲ့ နွားမိခင်လို ရှေ့တိုးနောက်ဆုတ်
ကိုယ့်အိမ် ကိုယ့်ယာဆီကို တပ်ဆုတ်ချင်နေတယ်
အိပ်မပျော်တဲ့ညကပေါ့
တဏှာ နဲ့ ဥပါဒါန်အကြား အဝေး
ရေချိန်တစ်ခုနဲ့ ချိန်ကြည့်ခဲ့တယ်
အိပ်မပျော်တဲ့ညကပေါ့
ရော့ရော့သွားတဲ့အချစ်တွေအကြောင်း ချော့ချော့တွေးရင်း
အကင်းမသေ သေးတဲ့ အလင်းမှာပျံနှံ့နေတာတောင် အိပ်တန်းကိုမေ့မေ့ကုန်ရော
အိပ်မပျော်တဲ့ညကပေါ့
စိတ်ခြေရာတွေကို ကောက်သင်းကောက်ရင်း
မနက်တွေကို မိုးကြည့်နေခဲ့တယ်
အိပ်မပျော်တဲ့ညကပေါ့
အိပ်မက်တွေကို အသေသတ် ဒီလိုနဲ့ အိပ်မပျော်ခဲ့ပါဘူးလေ ။
မောင်ရေခဲ
August 4, 2013 at 12:10am
No comments:
Post a Comment